في الكشف المبكر حياه
ساعات كتير بيجي المريض و لما بنقيس ضغطه و سكره و نشوف التحاليل الاخيره بتاعته..فنعاتبه انه ليه سايب الحاجات دي مش مظبوطه كده ؟ فيكون الرد التقليدي "طب ما انا باخد العلاج و هما علي طوال عاليين كده هعمل ايه تاني و بعدين حتي لو عاليين في التحاليل و القرايات فانا الحمد لله مفيش لا صداع و ترجيع ولا عدم اتزان زي اللي كان بيجيلي زمان"..لا لا يا عم الحاج اللي انت بتقوله ده مش حاجه حلوه خالص زي ما انت فاهم..ده مؤشر سيء جدا يعلن عن تكييف جسمك مع معدلات الضغط و نسب السكر العاليه طوال الوقت مما يؤدي الي اختفاء نسبي للاعراض الظاهريه التي يشعر بها المريض..في الوقت اللي قرايات الضغط و السكر العاليه مأثره بعنف علي جميع اجزاء جسمه من اول المخ مرورا بقاع العين و الاسنان و القلب و الكلي و المعده و القولون و المثانه و الاعصاب الطرفيه و الاوعيه الدمويه و كل ما تتخيل ..لحد ما كفاءه هذه الاجزاء تبدأ في التدهور..ساعتها بقي تبدأ معاناه المريض الحقيقيه من خلال مضاعفات هذه الامراض المزمنه علي وظائف اعضاء الجسم كله..فكره الارتضاء بالحاله اللي انا عليها و اني اضحك علي نفسي و اقول اني عامل اللي عليا و زياده باني ملتزم في العلاج..لا عزيزي المريض دورك مش قاصر نهائي علي العلاج..لازم تغيير شامل في نمط حياتك و نظامك الغذائي مع متابعه معدلات الضغط و السكر -كونهم اكثر الامراض المزمنه شيوعاً في الشعب المصري -بشكل دوري و منتظم..فلو لقيت ان المعدلات مش مظبوطه طول الوقت لازم ترجع فوراً للطبيب المعالج لتغيير نوع او تركيز او جرعه او توقيت تناول العلاج أو الوقوف علي سبب عدم استجابه جسمك للعلاج الحالي و علاجه..و تفضل وراهم بدواء و اتنين و تلاته..لحد ما يستقروا في المعدلات الطبيعيه من خلال المتابعه الدوريه للقياسات زي ما اتفقنا..ساعتها تقدر تطمن شويه علي حاجتين..الاولي ان ظهور المضاعفات هيبقي بشكل بطيء و علي سنوات كتير ربنا يمد في عمر حضراتكم..و الحاجه التانيه ان استجابه هذه المضاعفات للعلاج هتبقي افضل و اسرع في حاله استقرار معدلات الامراض المزمنه حول النسب الطبيعيه..بمعني ان اول طريق علاج المضاعفات هو ضبط معدل ضغطك و سكرك..غير كده ستندم وقت لا ينفع الندم لانك هتبقي بتلف في دايره مقفوله ما بين ضغط و سكر مش مظبوطين فمأثرين علي وظائف الجسم كله..و اختلاف بوظائف الجسم يؤدي الي عدم انضباط الضغط و السكر و تفضل انت حبيس الدايره دي..جسمك امانه فحافظ عليها.. ممكن لو كملت قرايه الكلام للسطر ده تقول في سرك انها "أفوره دكاتره" مش اكتر زي اللي مصدعنا بيه في التليفزيون..بس صدقني لا..هو ده الواقع الاليم اللي بنشوفه يوميا في مئات المرضي و اللي دايما بيجوا متاخرين -زي البوليس في افلام الابيض و اسود- لانهم بيتعاملوا مع اجسامهم معامله العربيه و انه طول ما هي دايره مش هروح للميكانيكي..لا تأكد انه في الكشف المبكر حياه..دمتم في صحه و سعاده باذن الله🤍