اللي يصعب عليك..يزعلك!🫤🤫
فيه مثل شعبي قديم بيقول ان "اللي يصعب عليك يفقرك.." حاجه زي كده..انا بقي ادركت مؤخرا ان "تعاطف الدكتور و اهتمامه الزياده بالمريض،،يزعله"..ليه؟؟؟؟..لأن المريض أو اهله و لأول وهله بيفتكروا ان ده خلاص حق مكتسب و مشروع ليهم و انه الدكتور لو مقامش بيه لاي ظرف خارج عن ارادته يبقي فاشل و مقصر و معندوش ضمير و بيتاجر بالام الناس و غيرها من الموروثات الشعبيه لكارهي الدكاتره و يشهروا بيه و يحسبنوا عليه و يلعنوا سلسفين اللي جابوه..خدمه الكشف هي خدمه مدفوعه الاجر مسبقاً و بتنتهي تلك الخدمه عند لحظه خروج المريض من غرفه الكشف اما ما دون ذلك فهو كرم زائد و تفضل محمود من الدكتور علي ان يسأل الله ان يتقبله في ميزان حسناته و لابد ان يُقابل ذلك من المريض و اهله بكل احترام و تقدير و مراعاه لطبيعه عمله و ظروفه الشخصيه..و أكم من دكاتره أفاضل علاقتهم بالمريض بتنتهي بمجرد الانتهاء من الكشف او اجراء العمليه و مش بيكلفوا نفسهم عناء الرد علي استفسارات و استغاثات المريض و اهله..إما عشان بيشتروا دماغهم و يريحوا نفسهم من الصداع و وجع الدماغ..يا إما بيكونوا تجرعوا مراره نكران الجميل و جحود المريض و اهله اكثر من مره فبيقرر الطبيب انه ينحي مشاعره جانباً و يجرد هذه العلاقه من انسانيتها بالمره و يتعامل معاها علي انها "اكل عيش" زي موظف الشهر العقاري و تاجر الفاكهه..الدكتور عمره ما كان مغسل و ضامن جنه..لا هو بيعمل اللي شايفه في صالح المريض طبياً عن خبره و دراسه و درايه و لكن الشفاء ده شيء بيد الخالق و ما الطبيب الا وسيله لذلك فمش من حقك انك تقيم اداء الطبيب بشفاءك من عدمه ولا تحاسبه علي نتيجه اهمالك لصحتك و تقصيرك في حق نفسك و رايحله بعد فوات الاوان متخيل انه توكيل سيارات هيغير الجزء العطلان و يطلعك من تحت ايديه فابريكا ..الموضوع فعلا شائك و مثير للجدل و لكني اقتنعت فعلا ان اللي يصعب عليك يزعلك..و يزعلك جامد كمان!🤷🏽♂️