رساله اعتذار لكل مرضانا الاعزاء📃
مريضي العزيز..بعد التحيه..أعلم جيداً مدي تضررك الشديد من طول فتره الانتظار للكشف..انا بطبعي انسان لا يطيق الانتظار و ببدا ازهق و اتعصب لو قعدت عشر دقايق علي بعض مستني ادخل لحد و في الغالب بمشي حتي لو معملتش اللي انا جاي عشانه لدرجه اني مجددتش بطاقتي و رخصتي بقالي عشر سنين..بس عايزك تعرف اني بمقدرتي اني اخلص كل الكشوفات في نص ساعه و اروح بيتي..و دي حاجه بنسميها في مجالنا "Fast Heart" يعني "قلب سريع" يعني "أنتش و أجري" بصوت مايكل جاكسون لجيل ويجز و لكن..اولا ان بطبعي مبعرفش احرج حد او اقوله متكملش انا فاهم او عارف اللي انت عايز تقوله..ثانيا اغلب المرضي اللي عندي من كبار السن اللي بيعانوا من الوحده و العزله فما بيصدقوا يلاقوا حد يسمعلهم..كتير منهم مش بيكون حد حاجه عضويه و كل اللي بيعاني منه هو الاكتئاب فمجرد انه يتكلم و يقول اللي جواه بيرتاح..حاجه تانيه ان اي كلمه او معلومه المريض يشوفها هايفه او لا تستحق الذكر فبيقلها كده بين السطور ممكن هي تبقي مفتاح الوصول لتشخيص حالته ..دكاتره كتير حاصلين علي شهادات الدنيا كلها و عيادتهم بتنش لمجرد ان اسلوبهم مش حلو مع الناس و بيتكلموا مع المريض بعجرفه و هي كلمتين و اتفضل وقتك خلص..فطبيعي المريض بيخرج من عنده حالف انه مش رايحله تاني حتي لو هو إله الطب..الخلاصه اني عايزك تبقي عارف اني ببقي قاعد جوه و مدرك قد ايه انت زهقان و حران و غيرها من المضيقات و لسان حالك اني مش داخل لمجدي يعقوب يعني..فأنا بحاول قدر الامكان اني احل المشكله دي..طبعا دي مش مشكله خاصه دي مشكله عامه بتواجه دكاتره كتير جدا بيراعوا ربنا و بيحللوا تمن الكشف اللي بياخدوه..نقطه اخيره بلاش تطلع زهقك ع البنات اللي بره عشان ملهمش أي ذنب..هما موجودين في المكان لمساعدتك و بيقابلوك بابتسامه و بيعاملوك بمنتهي الذوق و الود و بيدولك بونبوني كمان😂..فبراحه عليهم كده عشان خاطري🫶..و اسف للاطاله..مش هيبقي في الكشف و الرساله كمان يعني 🤦🏽♂️🤷🏽♂️